مام جەلال بۆ ناگەرێتەوە؟

!
نوسینی:كامی گوهەرزی
نزیكەی شەش مانگە ئاڵوزییەكانی نێوان هەرێم و بەغدا تەشەنەیان كردووە و چەند مانگێكە مام جەلال سەردانی دەرەوەی وڵات كردووە و لە گورەپانی سیاسی عێراقدا دابڕاوە،

هەڵبژاردنی بەرێز جەلال تاڵەبانی وەكو سەرۆك كۆماری عێراقی فیدراڵ، ئیمتیازێكی گەورەیە و پێویستە لە ڕووی هاوكێشە سیاسییەكانەوە كورد باشترین قازانجی لێی كردبا، بەڵام پێم وایە لەم ڕوویەوە كورد تەنها زیانی پێگەیشتووە، چونكە تەنها كورسییەكی بە هێزی كورد لە بەغدا بێ سود بووە !،لەكاتی

مافخواردنی كوردیش ( كە نەتەوەی خودی "مام جەلال "ــە ) سەرۆك كۆمار خۆی بە بێ لایەن دەنوێنێت و بە پراكتیزەش لایەنگیری لایەنی دیكتاتورخواز دەكات !، لە كاتێكدا سەرۆكەكان لە كاتی بینینی زێدەروویی و مافخواردنی خەڵكانێك لە لایەن هێزێكی سیاسییەوە، پێویستە بە دەنگ بێن، نەك بێ لایەن بن!، دوایی فشارێكی زۆر و خۆ دەربازكردن لە هەلویستێكی كوردانەدا، و (لە دیدی خۆیدا) ڕاگرتنی بالانسێك لە نێوان هێزە سیاسیەكاندا بەمەبەستی دەسكەوتی حزبی و كەسێتی، مام جەلال بڕیاریدا بۆ چارەسەری بچێتە دەرەوەی وڵات و خوی لەم تەنگەژەیە سیاسیەدا رزگار بكات، ئەمەش بۆیتە هۆی لەدەستدانی كارتێكی فشاری بە هێز لە سەر نوری مالكی، دڵسوزی و نیاز باشی مام جەلال ئەو كات دیار دەبوو ئەگەر خۆی كورسیەكەی بیبەخشیبایە كەسێكی تری كورد و وتبایە من نەخۆشم پێم ناكرێ ئەم كارە بكەم!، جا هیچ جیاوازییەك نەبوو ئەگەر ئەو كەسە یەكێتی بێت یان كوردێكی تەكنوقرات یان هەر حزبێكی تر، گرنگ ئەوە بوو ئەم كارتە بە هێزەی كە لە دەستی كورددایە ئێكسپایەر نەدەبوو، ئەگەر دوایی یەكلابونەوەی ئەو كێشە سیاسیانەی لە نێوان هەرێم و بەغدادا هەن، سەرۆك كۆمار بگەرێتەوەش ئێدی هیچ سودی نییە، چونكە بە گەرانەوەی كات بۆ دواوە ناگەرێتەوە، كە پێم وایە ئەمەش ئامانجی جەنابی سەرۆك كۆمارە .... !.

ئەوەی مەبەستمە و جەوهەری بابەتەكە لە خۆی دەگرێتەوە، فاكتەری خۆدزینەوەی سەرۆك كومارە لە چارەسەری تەندروستی كێشە سیاسییەكانی عێراقی فیدراڵدا، هەر چەندە هیوادارم بۆچوونەكانم هەڵە بن و كەسێكی كورد دلَسوزتر بێت لەوەی باسی دەكەم و لەسەر كورسی سەرۆك كوماری ولاَتێكی وەكو عێراقە !، بەڵام وەكو دیار مام جەلال دەستكەوتی حزبی و كەسێتی پێی گرنگترە لە دەسكەوتی نەتەوەیی .

ئەم راستیانە چون دیار دەبن:

بەڕێز مام جەلال دركی بەو راستیەی كردووە كە حزبەكەی بەرەو لاوازبوونە و لەوە دەترسێت لە دوا رۆژێكی نزیكدا حزبەكەی بە تەواوەتی لە گورەپانی سیاسی ناوچەكەدا لاواز ببێت، مام جەلال ئەو راستیە دەزانێت كە پارتی دیموكراتی كوردستان تەنها فاكتەر بوو كە نەیهێشت برینەكانی ئێكەتی ببنە ئەگەری لەناوچوونی بە شێوەیێكی گەورە، بەلای مام جەلالەوە هیچ دلَنیاییەكی تێدا نییە پارتی بەردەوام بێت لە سەر ئەم دەستگرتنە !، چونكە:

یەك: ئەو واتێدەگات لە سیاسەتدا هەستی عاتفی بونی نییە.

دوو: ئەو زور جار خیانەتی لە پارتی كردووە و لەوە دەترسێت پارتی ئەو تولەیە لێی بكاتەوە، چونكە دەزانێت شایانی تولەكردنەوەیە، و لێك نەترازانی رێزەكانی گەلی كوردە كە نەیهێشت پارتی پشت لە یەكێتی بكات، پێی وایە ئەمەش كاتێكی دیاری كراوی سیاسی هەیە.

لێرەدا مام جەلال پێی وایە لەم باردۆخەدا پێویستە دڵی هیچ لایەنێك لە خۆی و حزبەكەی نەرەنجێنێت و سودی حزبی و كەسێتی لە دوا بەرهەمی ئەم ناكوكییانە وەربگرێت و حزبەكەی بگەیێنێتە دوخێكی باشتر، لە كوتاییشدا مام جەلال دەچێتە پاڵ جەمسەرە سەركەوتووەكە، ئەگەر لە ناخۆشترین و هەستیارترین باردۆخێكدا كە بە سەر كورددا تێدەپەرێت، جەنابی دیار نەبێت و هەلَویستی پوزەتیڤی بۆ كوردی نەبێ، ئەی چ ڕامانی دیكەی هەیە بێجگە لە ناوەرؤكی وتارەكەم؟؟، پێم وایە تاكو كێشەكانیش یەكلایی نەبنەوە، مام جەلال نەخؤشە و پێویستی بە چارەسەری هەیە، لە دەرەوەی وڵات تەنها!، هیوادارم هەوادارانی بەڕێزی یەكێتی نیشتیمانی كوردستان، بە دلَێكی كراوە و مەنتقیانە بابەتەكەیان خوێندبێتەوە و مەبەستم هێرش كردن نییە و ئەوەی دەیبینم و بیروباوەرم پێیەتی دەنوسم دوور لە ئینتیمای حزبی، هەموومان پێویستە رەخنە لە كەم و كورییەكانی خومان بگرین، تاكو لە كوتاییدا بەسەر دوژمنەكانی گەلەكەماندا سەربكەوین و مولەت بە هیچ سەركردەیەك و لایەنێك و كەسایەتییەك نەدەین چیتر لە سەر حسابی ئێمەی كوردی خێر لە خو نەدیو، دەستكەوتی كەسێتی و حزبی بەدەست بێنێت